بنیادی اور دیہی مراکز صحت کو آؤٹ سورس نہیں کرنے دیں گے۔حافظ نعیم الرحمن

20گھنٹے پہلے

اہو ر 12 اپریل 2025ء

امیر جماعت اسلامی حافظ نعیم الرحمن نے کہا ہے کہ بنیادی اور دیہی مراکز صحت کو آؤٹ سورس نہیں کرنے دیں گے۔ ڈاکٹرز، نرسز اور پیرامیڈیکل سٹاف میں سے ایک کو بھی نوکری سے نکالا گیا تو پنجاب حکومت کا تعاقب کیا جائے گا، گرینڈ ہیلتھ الائنس پنجاب کے ساتھ ہیں۔ وزیراعلیٰ پنجاب خاتون ہیں، انھیں احتجاج کرنے والی خواتین کا کیوں خیال نہیں؟ سب کو معلوم ہے موجودہ حکومت کیسے معرضِ وجود میں آئی، خود ٹھیکے پر چلنے والی حکومت تمام بنیادی عوامی ضروریات کو بھی ٹھیکے پر دینا چاہتی ہے، اہل اقتدار پنجاب سمیت پورے پاکستان میں مسترد شدہ لوگ ہیں، عوام نے انھیں ٹھکرا دیا، یہ اسٹیبلشمنٹ اور فارم 47کے سہارے اقتدار میں آئے۔ اداروں کی لوٹ سیل کرنے والوں کا راستہ روکیں گے، عوام دشمن اقدامات بند کیے جائیں۔ ان خیالات کا اظہار انھوں نے مال روڈ پر گرینڈ ہیلتھ الائنس پنجاب کے زیراہتمام ڈاکٹرز، نرسز اور پیرامیڈیکس کے احتجاجی دھرنے میں شرکت کے موقع خطاب کرتے ہوئے کیا۔ سیکرٹری اطلاعات قیصر شریف، امیر پنجاب وسطی جاوید قصوری اور امیر لاہور ضیا الدین انصاری ایڈووکیٹ بھی اس موقع پر موجود تھے۔

امیر جماعت نے کہا کہ جس بادشاہانہ طرز عمل سے مریم نواز حکومت چلا رہی ہے، صوبہ میں یہی وطیرہ ان سے قبل ان کے والد اور چچا نے اپنایا ہوا تھا، انھیں صرف اداروں کو اپنا نام دینے اور ان پر تختیاں لگانے کا شوق ہے، پنجاب پر مسلط شریف خاندان بتائے کہ کیا حکومتیں صحت اور تعلیم کو آؤٹ سورس کرتی ہیں؟ حکومت اور ریاست کی ذمہ داری ہے کہ عوام کو سستی معیاری تعلیم اور صحت کی سہولیات یقینی بنائے۔ شہریوں کی عزت، جان و مال اور آبرو کی حفاظت اور امن کا قیام بھی حکومت اور ریاست کی بنیادی ذمہ داری ہے، حکمرانوں نے عوام سے سب کچھ چھین لیا۔ انھوں نے کہا کہ وہ کل کراچی میں غزہ ملین مارچ میں شرکت کے لیے جا رہے تھے، تاہم انھوں نے یہ ضروری سمجھا کہ اپنے حق کے لیے آواز بلند کرنے والوں کے ساتھ بھی اظہار یکجہتی کریں۔ انھوں نے مظاہرین کو یقین دلایا کہ جماعت اسلامی ان کے ساتھ کھڑی ہے، حکومت کو ادارے آؤٹ سورس نہیں کرنے دیں گے۔

حافظ نعیم الرحمن نے کہا کہ موجودہ حالات میں اپنے حق کے لیے آواز بلند کرنے والے قوم کے ماتھے کا جھومر ہیں، مزاحمت سے ہی قومیں زندہ رہتی ہیں۔ انھوں نے مظاہرین سے کہا کہ وہ اس بات پر بھی غور کریں کہ سیاسی اور اپوزیشن پارٹیاں جو زندہ باد اور مردہ باد کے نعروں میں مصروف ہیں، عوام کے بنیادی ایشوز پر ان کا ساتھ دینے کے لیے تیار نہیں، ایسی پارٹیوں اور لیڈران کے طرز عمل کو دیکھ کر فیصلہ کیا جائے کہ کیا واقعی وہ درست سیاست کر رہے ہیں، ملک میں سیاسی پارٹیاں فیملی انٹرپرائز، ون مین شو اور وصیتوں پر چل رہی ہیں،صرف اور صرف جماعت اسلامی ہی عوامی ایشوز پر سٹینڈ لیتی ہے۔ انھوں نے کہا کہ جماعت اسلامی کی نیشنل لیبر فیڈریشن اور تمام قیادت مظاہرین کے ساتھ سیسہ پلائی دیوار کی مانند کھڑی ہے اور ان سے مکمل اظہار یکجہتی کا اعلان کرتی ہے۔