دنیا پاکستان کی طرف دیکھ رہی ہے، نوجوان مایوس نہ ہوں ، حافظ نعیم الرحمن

3گھنٹے پہلے

دنیا پاکستان کی طرف دیکھ رہی ہے، نوجوان مایوس نہ ہوں ، حافظ نعیم الرحمن
حکمران طبقہ نے قرضے معاف کرائے، تعلیم ، صحت، تھانہ کچہری کا نظام تباہ کردیا
نوجوانوں کو چھوٹے کاروبار کے لیے بلاسود قرضے دیں گے، امیر جماعت اسلامی پاکستان کا الخدمت فاؤنڈیشن کے تحت چیک تقسیم کرنے کی تقریب سے خطاب

امیر جماعت اسلامی پاکستان حافظ نعیم الرحمن نے کہا ہے کہ دنیا پاکستان کی طرف دیکھ رہی ہے، نوجوان مایوس نہ ہوں، فرسودہ نظام کے خلاف جدوجہد کریں۔ پاکستان سیاستدانوں ، جرنیلوں ، طاقتوروں کا نہیں عوام کا ہے۔ جماعت اسلامی نوجوانوں کو چھوٹے کاروبار کے لیے بلاسود قرض فراہمی کا آغاز کرے گی۔ ان خیالات کا اظہار انہوں نے وزیرآباد میں الخدمت فاؤنڈیشن پاکستان کے تحت عوام میں چھوٹے کاروبار کے آغاز کے لیے بلاسود قرض فراہمی کی تقریب سے خطاب کرتے ہوئے کیا۔ امیر جماعت اسلامی پنجاب وسطی جاوید قصوری ، صدر الخدمت پنجاب اکرام الحق سبحانی، نائب صدر الخدمت پاکستان ابرار احمد مگوں اور امیر ضلع ناصر محمود کلیر نے بھی شرکائ سے خطاب کیا۔
امیر جماعت اسلامی نے کہا کہ حکمران طبقہ نے قرضے لے کر معاف کرائے ، انہوں نے تعلیم ، صحت حتیٰ کہ کھیل تک کے شعبوں کو تباہ کردیا۔ ملک میں تھانہ کچہری کا نظام برباد ہے، انتخابات فارم سنتالیس کے تحت ہوتے ہیں، اختیار چند خاندانوں تک محدود ہے، نوجوانوں کو روزگار نہیں مل رہا ، نئی نسل میں جان بوجھ کر مایوسی پھیلائی جارہی ہے، منشیات کی لعنت عام ہے، ان حالات میں جماعت اسلامی جہاں فرسودہ نظام کے خلاف جدوجہد کررہی ہے وہیں بہتری کے لیے کاوشیں بھی جاری رکھے ہوئے ہے، مینار پاکستان پر تاریخی اجتماع عام سے قوم میں امید بیدار ہوئی ہے۔
حافظ نعیم الرحمن کا کہنا تھا کہ حکومت نے آئی ایم ایف کے احکامات مان کر زرعی ادویات کی قیمتوں میں اضافہ کردیا، چھوٹے کسان پریشان ہیں۔ حکمران عوام کے فائدے کے لیے چند اقدامات محض نمائشی مقاصد کے لیے کرتے ہیں، انہیں عوام یا نوجوانوں کی مجموعی بہتری سے کوئی سروکار نہیں، عوام کو بے اختیار کردیا گیا، پنجاب کا نیا بلدیاتی نظام آئین و جمہوریت کے منافی ہے، اس کالے قانون کے خلاف جدوجہد جاری ہے۔ پنجاب میں ایک کروڑ بچے سکولوں سے باہر ہیں اور ان حالات میں صوبہ میں سرکاری سکولوں کو فروخت کیا جارہا ہے۔
امیر جماعت اسلامی نے مزید کہا کہ موجودہ حالات سے نوجوان طبقہ مایوس نہ ہو بلکہ جماعت اسلامی کے ساتھ مل کر جدوجہد کرے، پاکستان بڑی قربانیوں سے حاصل کیا گیا ہے ، ہمیں مل کر اسے عظیم فلاحی ریاست بنانا ہے۔ حافظ نعیم الرحمن نے کہا کہ الخدمت بنوقابل پروگرام کے دائرہ کار کو وسیع کردیا گیا ہے، الخدمت زی-کنیکٹ (Z-Connect) پروگرام کے ذریعے نوجوانوں کو جہاں آئی ٹی کی تربیت فراہم کر رہی ہے وہیں بچوں اور بچیوں کے لیے فنی تربیت کا آغاز بھی ہوگیا ہے ، آنے والے دنوں میں نوجوانوں کو چھوٹے کاروبار کے آغاز کے لیے بلاسود قرض بھی فراہم کیا جائے گا۔ انہوں نے کہا کہ ملک میں اخلاقی بحران ہے ، جماعت اسلامی اور الخدمت نے نوجوان نسل کی اخلاقی تربیت کا اہتمام کیا ہے۔ امیر جماعت اسلامی نے کہا کہ ظلم کے خلاف جدوجہد تیز ہوگی اور قوم کے تعاون سے پاکستان میں حقیقی تبدیلی لائیں گے، عوام کا استحصال قبول نہیں۔